1. Na Rialacha Cúirte Dúiche (An tAcht um Cheartas Coiriúil (Cúnamh Frithpháirteach), 2008), 2010 is teideal do na rialacha seo.

2. Tiocfaidh na rialacha seo i ngníomh an 5ú lá d’Aibreán 2010 agus forléireofar i dteannta na Rialacha Cúirte Dúiche, 1997 go 2010 iad.

3. Leasaítear na Rialacha Cúirte Dúiche, 1997 (I.R. Uimh. 93 de 1997):

​(i) tríd an méid seo a leanas a chur in ionad theideal Ordú 21:

​ii) tríd an méid seo a leanas a chur isteach díreach i ndiaidh riail 2 d’Ordú 21:

“3. (1) San Ordú seo, ciallaíonn “Acht 2008” an tAcht um Cheartas Coiriúil (Cúnamh Frithpháirteach), 2008 (Uimh. 7 de 2008).

(2) Maidir le hon iarratas chuig Breitheamh den Chúirt Dúiche ar litir iarrata a eisiúint faoi alt 62(1), alt 67(2), alt 73(1) nó alt 77(1) d’Acht 2008—

(a) i gcás go mbainfidh an t-iarratas le himeachtaí arna dtionscnamh cheana féin i gcoinne duine, déanfar é, mura n-ordóidh nó mura gceadóidh an Breitheamh a mhalairt, trí fhógra iarratais i bhFoirm 21.8, Sceideal B, a bheidh le filleadh go dtí an dáta a bheidh sonraithe ar an toghairm nó an dáta is túisce dá éis a bheidh an duine cúisithe sceidealta chun bheith os comhair na Cúirte Dúiche, agus, mura n-ordóidh nó mura gceadóidh an Breitheamh a mhalairt, déanfar an fógra iarratais a thaisceadh leis an gCléireach agus seirbheálfar cóip de ar an ionchúisitheoir nó ar an duine cúisithe, de réir mar a bheidh, tráth nach déanaí ná dhá lá roimh an dáta sin;

(b) in aon chás eile, déanfar ex parte é ag aon suí den Chúirt trí fhógra iarratais i bhFoirm 21.8, Sceideal B.

(3) Féadfaidh an Breitheamh, sula ndéanfaidh sé nó sí ordú ar iarratas den sórt sin, a cheangal ar an iarratasóir dréacht comhlánaithe d’fhoirm na litreach iarrata, ina mbeidh an fhaisnéis a cheanglaítear a áireamh i litir den sórt sin le hAcht 2008, a thabhairt ar aird, nó a thaisceadh leis an gCléireach, lena bhreithniú ag an mBreitheamh.

(4) I gcás go ndéanfar ordú faoin riail seo, féadfaidh cibé forálacha breise a bheith san ordú a mheasfaidh an Breitheamh den Chúirt Dúiche is gá nó is cuí chun a urasú aon fhianaise lena mbaineann a ghlacadh.

4. Is i bhFoirm 21.9, Sceideal B a bheidh deimhniú de réir alt 58(1)(b) d’Acht 2008. Déanfaidh an Cléireach deimhniú den sórt sin a eisiúint ar litir a fháil ón Stiúrthóir Ionchúiseamh Poiblí, nó ó oifigeach nó aturnae don Stiúrthóir a bheidh údaraithe go cuí chuige sin, ina n-iarrfar deimhniú den sórt sin.

5. Maidir le gach iarratas ar chead chun doiciméad a eisiúint agus a sheirbheáil de réir alt 80 d’Acht 2008, déanfar ex parte é agus beidh fianaise ó bhéal mar thaca leis, agus tabharfar ar aird, ar iarratas den sórt sin, dréacht den doiciméad a bheartaítear a eisiúint agus a sheirbheáil (is dréacht a mbeidh an t-ábhar ann de réir alt 80(4) d’Acht 2008) agus aon aistriúchán a cheanglaítear faoi fho-ailt (2) agus (3) d’alt 80 d’Acht 2008. Beidh mar thaca leis an iarratas freisin fianaise ina sainaithneofar an stát eile a gcreidtear an duine a mbeartaítear an doiciméad a sheirbheáil air nó uirthi a bheith ann, aon fhaisnéis a bheidh ar fáil don iarratasóir i dtaobh cá bhfuil an duine a bheartaítear a sheirbheáil, agus aon fhaisnéis eile is gá chun a chumasú don Chúirt a rogha a fheidhmiú de réir alt 80.”;