Dírítear aird na gcleachtóirí go léir ar fhorálacha alt 11 den Acht um an Dlí Sibhialta agus um an Dlí Coiriúil (Forálacha Ilghnéitheacha), 2020.

Ón 12 Aibreán, 2021, i gcás ina measann an Chúirt, maidir le caingean díobhálacha pearsanta, gur féidir leasanna an cheartais a chomhlíonadh go cothrom tríd an gcaingean sin a éisteacht ar chianardán, féadfaidh an Chúirt a ordú go leanfar leis an éisteacht ar an mbealach sin.

Féadfaidh aon pháirtí i gcaingean díobhálacha pearsanta, ar fhógra a thabhairt d’aon pháirtí eile, iarratas a dhéanamh chuig an mbreitheamh atá i bhfeighil an liosta Díobhálacha Pearsanta ar éisteacht den sórt sin. Agus, murar féidir cúis mhaith a bhunú i dtaobh cén fáth nár cheart an chaingean a éisteacht ar an modh sin, ordóidh an Chúirt cianéisteacht agus tabharfaidh sí cibé treoracha breise is gá maidir le ham agus modh na trialach.

Cleachtais chun páipéir a thaisceadh le haghaidh cásanna Díobhálacha Pearsanta atá le héisteacht ar chianardán.

1. Déanfaidh an Gearánaí na doiciméid seo a leanas a thaisceadh sa Seomra Liosta faoi 12 meán lae ar an Déardaoin roimh an dáta atá socraithe don éisteacht:

1. Leabhar pléadála comhaontaithe.
2. Leabhar ina bhfuil na tuarascálacha saineolaithe go léir a mhalartaítear de bhun IR 391/98
3. Leabhar ina bhfuil aon doiciméad/doiciméid eile a bhfuil sé beartaithe ag na páirtithe brath orthu. Soláthróidh an cosantóir cóipeanna boga d’aon doiciméad/doiciméid den sórt sin don ghearánaí, seachas na cinn dá dtagraítear ag 2 thíos, laistigh de 4 lá tar éis dó/di iarratas a fháil ar dhoiciméadú den sórt sin.
4. Leabhar doiciméad a bhaineann le haon éileamh ar dhamáistí speisialta nach gcomhaontaítear.

2. I gcás páirtí ar bith a bhfuil sé ar intinn aige amhras a chaitheamh ar chreidiúnacht finné trí rud a d’fhéadfaí a chur síos mar dhoiciméid nó ábhair gan choinne a thabhairt isteach le linn na croscheistithe, ba cheart dó cóipeanna de dhoiciméid/ábhar dá leithéid a thaisceadh sa Seomra Liosta faoi 12 meán lae ar an Déardaoin roimh an dáta atá socraithe don éisteacht.  Ní gá don pháirtí a dhéanann amhlaidh fógra a thabhairt d’aon pháirtí eile maidir lena ghníomhartha. Ba cheart na doiciméid/na hábhair sin a chur i gclúdach séalaithe ar a bhfuil ainm agus uimhir thaifid an cháis, dáta na héisteachta agus ainm agus sonraí teagmhála an aturnae a thaisc na doiciméid/na hábhair sin.
3. Ní bhreithneoidh breitheamh na trialach aon doiciméad a sheachadtar chuig an Seomra Liosta, ach amháin i gcás Leabhar na bPléadálacha, go dtí go dtosóidh an triail agus, air sin, féadfaidh na páirtithe aon chomhaontú a chur in iúl don Chúirt ar thángthas air maidir leis an mbonn ar a bhféadfaí aird a thabhairt ar aon doiciméad nó tuarascáil den sórt sin.
4. Ní mór do pháirtithe i gcaingean atá liostaithe le héisteacht ar chianardán a chinntiú go bhfuil clúdach cuí Wifi/Idirlín ag gach finné a bhfuil sé ar intinn aige fianaise a thabhairt. Sa chás go bhfuiltear ag súil le haon deacracht nasctha/clúdaigh nó nuair is cuí é seo a dhéanamh, ba chóir do pháirtithe socrú a dhéanamh go bhfreastalóidh finnéithe ar fhíorais ar oifigí a n-aturnae chun críocha a gcuid fianaise a thabhairt, faoi réir treoir sláinte phoiblí a chomhlíonadh i gcónaí.
5. Táthar ag súil go mbainfidh an Treoir Chleachtais seo, faoi réir athrú ar an suíomh ina dtaiscfear leabhráin thrialach, le gach caingean maidir le díobhálacha pearsanta cibé áit a liostaítear le héisteacht iad le héifeacht ó thús théarma na Tríonóide.
6. Ní chuirfidh aon ní sa Treoir Chleachtais seo cosc ar bhreitheamh den Ard-Chúirt aon chaingean díobhálacha pearsanta a éisteacht ar chianardán lasmuigh de Bhaile Átha Cliath roimh thosach feidhme Théarma na Tríonóide ar choinníoll go dtoilíonn na páirtithe nó i gcás ina bhfuil imthosca eisceachtúla ann a mbeadh, ar mhaithe leis an gceartas, sainordú ann do chur chuige den sórt sin.

Sínithe:
Mary Irvine
Uachtarán na hArd-Chúirte
Arna dhátú 7 Aibreán, 2021.